Србија наголемо го увезува ова од Македонија, а во една гранка сме рекордери со 3,1 милион евра вредност
Според податоците и анализите, во Србија во 2022 година биле увезени околу 305.990 тони овошје, што е за 9,1 отсто помалку од една година порано, покажуваат податоците на Здружението за растително производство и прехранбена индустрија на Стопанската комора на Србија (ПКС).
Истовремено, вредноста на увезеното овошје и зеленчук изнесува 295,7 милиони евра, што е за 3,2 отсто повеќе во однос на 2021 година.
Највисока вредност на увозот во 2022 година оствариле бананите – 61,2 милиони евра, веднаш потоа лимонот и портокалот, што е вообичаено бидејќи се работи за култури кои не се карактеристични за нашата клима. Бананите со години се најувезуваното овошје кај соседите, но имаат и најголема потрошувачка во светот.
Во Србија ананаси најмногу пристигнувале од Еквадор, Костарика и Колумбија, пренесува „Агроњуз“. Најголем дел од портокали доаѓаа од Грција, Турција и Шпанија. Лимонот најмногу се увезувал од Турција, Аргентина, Шпанија и Грција, а грејпфрут од Турција.
Интересно е што Србија лани увезла и 26.126 тони јаболка во вредност од околу 3,7 милиони евра. И тоа најмногу од Македонија во вредност од 3,1 милиони евра. Јагодите се увезуваат од Грција, Албанија и Турција, крушите од Италија и Полска, нектарините и праските од Грција, Италија и Шпанија.
И додека увозот на овошје бележи квантитативен пад од странските пазари, испорачани се 169.752 тони зеленчук, што е за 10,3 отсто повеќе во однос на 2021 година, но вредноста на овие испораки (155,1 милиони евра) е речиси за една третина повисока во однос на претходната година. според податоците на ПКС.
Во 2022 година најмногу се увезувало компири, домати и грав, а малку помала количина кромид, замрзнат зеленчук и краставици. Доматите имале најголема вредност на увозот во 2022 година во износ од околу 21 милион евра или 14 отсто од вкупната вредност на увозот. Гравот остварил вкупна увозна вредност од 20,6 милиони евра или 13,3 отсто од вкупната вредност.
Во 2022 година најмногу се увезувале компири од Холандија и Франција, грав од Киргистан, домати од Албанија и Македонија, кромид од Холандија и Македонија и лук од Кина.
Од Македонија се увезувала зелка, од Македонија и Албанија свежи пиперки, од Албанија краставици, а во помали количини замрзнат грашок, спанаќ и друг замрзнат мешан зеленчук.
Лубеници најмногу од Грција, а многу помалку од Албанија и Македонија, се наведува во извештајот.
